Black Burns Fast lewer ’n snaakse, skerp en soms verrassend sagte blik op grootwordjare in ’n Suid-Afrikaanse konteks

Die titelsekwens, met sy strokiesprent-geïnspireerde grafika, het my sommer dadelik aan die styl en die toonaard van die film bekendgestel. Die gebruik van speletjie-geïnspireerde grafika bring ligtheid aan sensitiewe oomblikke, terwyl ’n kombinasie van visuele en in-kamera-effekte aan die rolprent ’n unieke aanslag gee. Pierre de Villiers se kinematografie staan uit en pas goed by die verhaal. Dit dra ook by tot die humor binne die tonele. Michael Botha se klankontwerp volg die film se speletjie-geïnspireerde styl, met klankeffekte wat help om die stemming van die fliek te voltooi. Die tempo, visuele effekte en spelagtige klankeffekte is egter baie prominent, en hoewel dit die film ’n moderne gevoel gee, sal dit dalk nie by almal aanklank vind nie. Die film se styl sal jonger kykers vermaak, terwyl die storie en humorsin aanklank by alle ouderdomme sal vind. 

Die diverse rolverdeling lewer ’n paar stereotipiese uitbeeldings van tipiuese Suid-Afrikaners wat ’n mens maklik in die werklike lewe sou herken, sonder dat die fliek verskoning vra daarvoor. Die akteurs Esihle Ndleleni en Muadi Ilung vertolk Luthando en Ayanda goed. Tog is dit die akteur Mila Smith, wat Luthando se beste vriendin Jodie speel, wat in verskeie tonele skitter met haar perfekte droë, onkonvensionele humor en opregte vertolking van die meer emosionele oomblikke van die storielyn.

Die film belig belangrike kwessies soos rassisme, klassisme en seksualiteit met sensitiwiteit, terwyl dit steeds ons kenmerkende, direkte Suid-Afrikaanse humor behou. Alhoewel die fokus op Luthando se seksualiteit val, sou dit interessant gewees het as die fliek ook sistemiese verandering ondersoek het, of ten minste een wit karakter gehad het wat van die stereotipes afwyk.

Die film se einde is oulik en los ruimte vir ʼn moontlike opvolgrolprent. As jy lus is om bietjie te lag en jou eie tienerdae te onthou, is hierdie die perfekte fliek om na te kyk. Dit is beslis ʼn ode aan die digter, Sappho.