Vlugtig – Daar’s ‘n Rooikappie én ‘n wolf in almal van ons
Resensie
In Vlugtig maak ons kennis met Simon Berg (Arno Greeff), ʼn aspirant akteur wat sukkel om ʼn deurbraak in die vermaaklikheidswêreld te maak. Hy het al heelparty kleiner rolle gehad, onder meer as ʼn wortel asook ʼn vark in ʼn kinderprogram. Dit kom dan as geen verrassing dat hy die sogenaamde kans van ʼn leeftyd met albei hande aangryp wanneer hy ʼn aanbod van een van sy grootste rolmodelle, die befaamde teaterregisseur Andreas Vog (Ernst van Wyk, wat ook die draaiboekskrywer was) kry nie. Vog werk aan ʼn nuwe Rooikappie-verwerking vir die verhoog, en vra Berg om as beide die houtkapper en die wolf te kom repeteer.
Maar Berg moet alles net so los en onmiddellik saam met Vog die woud (verfilm in Magoebaskloof) inslaan, waar dié vreemde regisseur gou begin om sy onortodokse metodes op sy toekomstige houtkapper en wolf te gebruik. Berg se enigste toevlug is Chantel (Jane de Wet) wat die rol van Rooikappie sal speel, asook ʼn verlate kothuis ‘n ent verder van waar die span tydens hul voorbereidings tuisgaan. Soos Vog se sadistiese en intimidasie tegnieke al hoe erger raak (dis kort voor lank duidelik dat hierdie veel meer as “method acting” is), moet Berg ook al hoe dieper in sy binneste grawe en met sy eie spoke wroeg om uiteindelik die oorhand te kry.
Arno Greeff (Blood & Water en Getroud met rugby: die Sepie) is baie oortuigend in sy rol as Berg en het hom uitstekend van sy taak gekwyt. ʼn Mens se simpatie lê vanaf die eerste skoot by hom terwyl hy jou op ʼn riller van ‘n rit neem – nie net deur die donker bos nie, maar ook deur die donker oerwoud van sy eie (en jóú) menswees.
Jane de Wet (Griekwastad en The Girl from St Agnes) lewer net so ʼn goeie vertoning as Chantel Opperman, en dit is opvallend hoe natuurlik sy en Greeff teenoor mekaar op skerm voorkom.
Op ʼn tegniese vlak werk al die departemente soos ʼn goed-geoliede masjien saam, vanaf die kamerawerk (Werner Botha) tot by kostuums (Anine Scheepers), en redigering (Dries Scholtz) tot by regie (Marinus Gubitz). Die film is vervaardig deur Danie Bester en die produksieontwerper is Waldemar Coetsee. Ek moet tog net die oorspronklike musiek deur Kyle Shepherd uitsonder. Dis so maklik om bekende musiek vir ʼn film te gebruik, so wanneer jy iets hoor wat nie net spesiaal gemaak is vir ‘n produksie nie, maar die tonele ook soos ʼn handskoen pas, dan mág mens liries raak. Wel gedaan!
Vlugtig neem die kyker op ʼn self-ontdekkingsreis waar jy herinner word dat almal eintlik ʼn Houtkapper, ʼn Ouma, ʼn Rooikappie asook ʼn Wolf in hulle het – dit hang net af van die omstandighede. Die een wat jy voer – dís die een wat sterker na vore sal kom.
Vlugtig wys nou op DSTV BoxOffice
Meer Inligting
Speeltyd
96 min
Skrywer en Regisseur
Ernst van Wyk | Marinus Gubitz
Webtuiste
Skerms
∞
Ouderdomsbeperking
16
Rolverdeling
Arno Greeff, Jane de Wet, Ernst van Wyk, Tobie Cronjé en Schalk Bezuidenhout
Sterre
4/5
Loket
Sien NFVF
Geskryf deur Roelof Bezuidenhout
Verdere Resensies
Bloedhond – Heerlike bangmaak-vermaak vir Halloween-maand
Bloedhond is ’n bloederige, spanningsvolle Afrikaanse gruwelfliek vol koue rillings, donker humor en onverwagse wendings – perfek vir Halloween, met sterk spel deur Cindy Swanepoel, Zak Hendrikz en Kevin Peyper, en beskikbaar op eVOD.
Hen – Rasend honger en stilweg boos.
Hen is ’n senutergende Afrikaanse riller deur Nico Scheepers met Stian Bam, Amalia Uys en Dawian van der Westhuizen. Op ’n afgeleë plaas in die laat 19de eeu ontvou ’n donker en bonatuurlike verhaal van geloof, vrees en vervloeking. Met skitterende spel en intense atmosfeer herinner Hen aan The Omen en Rosemary’s Baby – ’n film wat lank ná die laaste toneel bly spook.
Carissa: Een legkaartstukkie van háár lewe
Carissa (2025), ’n stadige maar visueel pragtige rolprent oor plattelandse lewe, familie, eenvoud en die ritme van menswees.
Kursusse
Drama
Regie
Klank
Kinematogarfie
Vervaardiging