Hunting Jessica Brok: ’n Suid-Afrikaanse aksieheldin wat Hollywood laat bloos

Aan die begin van die film is Danica Jones se vertolking nie vir my van die beste nie, maar sy vind uiteindelik haar voete en lewer dan geloofwaardige spel vir die res van die rolprent. Richard Lukunku en Hlubi Mboya (wat die rol van Lazar se meisie Sherri vertolk) is twee akteurs wie se spel my werklik beïndruk het. Albei was perfek vir hul rolle en dra beslis die fliek se storielyn.

Hunting Jessica Brok is stukke beter as vele Hollywood produksies van dieselfde aard – veral as jy van Bruce Willis se laaste rolprente gesien het wat werklik as gemorskos beskou kan word. Daarenteen bevat regisseur Alistair Orr se fliek aksiebelaaide elemente wat van die begin tot die einde wérk – van ontploffings tot ont-“koppings”. Dis 110% ’n skop, skiet en donder-storie met meer bloed en byt as wat ek in ’n lang ruk aanskou het. Die geweld kan party kykers dalk afskrik, maar dit is nie meer as waaraan ons in ʼn hedendaagse Hollywood aksierolprent gewoond is nie. Die kamerawerk, redigering en stemmingsmusiek was uitstekend, terwyl die visuele (VFX), spesiale effekte (SFX) kunstenaars, gevegschoreograwe sowel as waaghalskoördineerders ’n spesiale applous verdien. Hulle gee hulle Hollywood eweknieë sterk kompetisie.

Wat my effe gepla het terwyl ek die fliek gekyk het was van die karakters se vreemde aksente. Ek vermoed dit was veronderstel om Oos-Europees te klink, maar dit was glad nie geloofwaardig nie. Daarmee saam het die karakter van Daniel Connor (gespeel deur Clyde Berning) meer lewens as ’n kat gehad – dít was ietwat vergesog en het my elke slag laat wonder of hierdie ’n aksie of gruwelfliek was (maar tog gepas vir Halloween, toe ek dit gekyk het).

Volgens Orr, is die vrae wat hy as regisseur in die fliek aan jou stel: “Kan ’n mens wegvlug van wie jy was?” en “Wat gebeur wanneer die wêreld jou dwing om ʼn donkerder weergawe van jouself te word?”Aan die einde van die dag is dit eintlik ’n universele vraag: As dit kom by ʼn lewensgevaarlike situasie, wat sal jy doen om jouself en jou geliefdes te beskerm? Kyk Hunting Jessica Brok en jy sal moontlik die antwoord vind.