Jungle Beat 2 – heerlike animasie-vermaak vir die jongspan

Nes Dee destyds in haar resensie oor die eerste film, het ek egter dieselfde kritiek: van die karakters kon minstens Afrika-aksente gehad het, al was dit net een. Als anders skreeu Afrika – daar is selfs proteas en hadidas! Ons weet dat bekende Amerikaanse en/of Britse akteurs gewoonlik gebruik word om as trekpleister vir ‘n film te dien, ten spyte van waar die fliek gemaak word, of watter land, taal en kultuur dit voorstel, maar as meer Afrika-aksente in hierdie geval gebruik kon word, dink ek sou die fliek selfs nóg beter ontvang word – en Afrika beter verteenwoordig.

Visueel is die film indrukwekkend en verbeeldingryk – dis kleurvol, aksiebelaaid en avontuurlustig. Temas sluit onder meer vriendskap, spanwerk en nuuskierigheid in – iets wat, indien ouers dit saam met hul kinders sou kyk, goeie besprekingspunte is. (En mag ek waag om te sê dat daar tog ook, baie slim temas van kolonialisme, evolusie en diktators ingevleg is – en dit verder versterk is met juis daardie spesifieke aksente – so dalk is die film tog nié net op kinders gemik nie?)

Die verhaal het my laat ontspan en op ‘n heerlike reis geneem, en vir die totale speeltyd my van die “regte” wêreld en al sy probleme laat vergeet. Dit wil gedoen wees! En is dit nie een van die grootste, indien nie dié belangrikste redes vir, en aspekte van, ‘n goeie rolprent nie?

As jy opsoek is na goeie, ligte vermaak vol positiwiteit en belangrike lewenslesse vir die jongspan, beveel ek Jungle Beat 2 sterk aan.