Khaki Fever – Wilder as die wildtuin

Die storie handel oor ’n groep wildbewaarders wat, weens ’n spesifieke rede (sonder dat almal dit weet), met mekaar kompeteer om te sien wie die meeste toeriste tydens die seisoen in die sak (of chalet?) kan kry, en in die proses die wildernis op horings neem  – met skreeusnaakse gevolge. Dis wel belangrik om te noem dat geen sekstonele enigsins eksplisiet is nie.

Die dialoog is skerp, die humor vinnig, en die vergelykings (ek dink aan “prag sogte en stoetbulle”), innuendos, en sinspeel op woorde oorspronklik en trots Afrikaans.

Die akteurs dra almal ewe veel by tot die sukses en genot van die film, wat onder al die “jukkerigheid” van die wildbewaarders, met broekies korter as hul beenhare eintlik baie hart het. Dus, ’n goeie, gelyke rolverdeling (onder leiding van Christa Schamberger) wat só baie maal een van die swakste elemente van ’n Afrikaanse film is vir my (veral as dit kom by die byspelers).

Albie (gespeel deur Francois Jacobs) het van die beste one-liners, wat soos hierdie jaar se Perseïede-meteoorreën tot sowat 72km per sekonde deur die lug trek!

My enigste kritiek is sommige liedjies op die klankbaan – hoewel dit seker gepas was vir die tema is dit eintlik die enigste plek waar die aan-mekaar gevloekery selfs mý gevang het, en ek gevoel het dat dit net in swak smaak was.

Die film is in die algemeen nie vir die “swak van hart”, die preutses, die konserwatiewes en selfs die voornemende nonne onder ons nie – tensy jy met volle vermomming jou bloos sal kan wegsteek, of ’n gat kan grawe en soos ‘n volstruis jou kop êrens in die grond sal kan indruk – maar gelukkig lewe ons in ‘n wêreld waar jy dit ook gladnie hoef te kyk nie – gebruik net jou afstandbeheer en verander die kanaal.

Soos ons weet, en volgens Innes self, maak hy gewoonlik goed wat “ernstige sosiale kommentaar lewer, maar mense het deesdae min kapasiteit vir swaar temas”, terwyl ’n onlangse Ster Kinekor-studie deur Nicolette Scheepers dit beaam: “baie plaaslike films word nie met ’n kommersiële ingesteldheid gemaak nie, maar is geneig om kwessies aan te spreek eerder as om ontvlugting te bied.” En ek stem heelhartig saam. Khaki Fever wys (sy) vleis – en sal die algemene kyker verras, laat skaterlag, en heerlik vermaak.